Damster Typen: De Piet Geezen ook wel Juttemoas of Bohemers genoemd

Hou ze aan lèste baide noamen kwamen, wait ik nait, moar de eerste is makkelk oaf te laiden. “Maal Piet”- ik heb hom nog even kend – woonde in ’t Solwerder Oosterens in ’n hoeske van “Jaan bakt nait”, zoals dei nuimd wuir.
Hai was ’n tiep in ’n Daam, dee peerdevillen en aander waark doar ’n aander laifst nait mit begönnen wol.
Ze nuimden hom ook wel “Kattenpiet”omdat e geern katten lustte. “Net zo geern as ie grode lu ’n hoas”, zee e ais tegen mien moeke.

Ik zai hom nog mit ’n stok achter kerk in grond schudden, om wörms boven te warken. Dei stak e din in buuts van zien boksem en din gong e visken..
Hail zuver zag e d’r vanzöls nait oet.

Zien tuttel wait ik nait. Ik vermoud Juttemoa. Zien dochter Geeze traude mit Hinderk Jepmoa,’n noam,dei allain moar op ’t gemaintehoes bekend was. Hai was ’n Vrais, dei nooit op veurgrond kwam. Zeker omdat e gain Damster was?
Hai dee aale soort lös wark. As ze over hom proatten was ’t altied Hinderk van Piet Geeze of Hinderk Piet.
’t Was ’n hoesholden, wel wat roeg, moar dat gain minsk overlast aandee en je heurden ook nooit,dat dainders last mit heur hadden.Ook heurde men nait voak, dat ze doen wazzen.
Ze hebben heur leven laank woond in Moushörn in ’n gaang, dei noar ’t daip oafluip, noast toen van netoares Klevengoa.

Heur kinder wuirden bei heur tuttel nooit aans nuimd as ‘Piet’en haitten Kloas, Aantje, Reenke, Jaanje, Hinneman en Geraad. Geraad is jong störven en Hinneman, dei ’n vetzaikte haar en Jaanje, dei moar ’n beetje slicht was ook.
Ik wait nog, dat Jaantje’s leste wéns was om in liekwoagen begroaven te worden en doar gaf e aale week cinten veur in ’t begraffenisfonds en ‘k heb liekwoagen nog Moushörn in zain goan en Jaanje d’r in zain droagen, wat ’n aandounlek ogenblik was en bie veul van de omstanders ’n troan ontlokte. Voader Hinderk, Kloas en Reenke en Aantje huilpen veul bie ’t törven, Kloas verdronk in Heekt en was wel trauwd – ik main mit ’n dochter van Willem Stoppels – moar luit gain kinder noa.

Reenke kwam loater bie drekstoup en trauwde mit  Haarmien Bracht (of Voetman), bie ’t boerenvolk “’t Wikwief”nuimd, omdat ze kwoad kon zain – joa, zai was kwoad genog – woarzeggen en de koart legde. ’t Zeggen was, dat ze dat leerd haar van Paiter Derks. Noa op de Wierde.’t Was ’n schier en kant wief, al leek ze wat op ’n katoel, dat aarms oet mouw kon steken en in grode ainsgezindhaid mit heur Reenke leefde. Kinder harren ze nait. Loater wazzen ze oppassers in zaikenberak bie drekstoup.

Ze binnen nog zo’n beetje tot welstand komen. Of dat van ’t koartleggen en ‘t ‘wikken’ komen is? Reenke luip aaltied vlög as of e hoast haar. Ik zai hom nog mit Haarmien, dei destieds Koboa nuimd wuir noar heur moeke, woarvan ze heur welbesproakthaid aarfd haar, dou ze noar ’t Roadhoes gongen mit haalve Moushörn achter zök, om te trauwen. Haarmien aal moar lachen en Reenke wis nait hou e bainen most inhòllen, om geaarmd mit heur in pas te blieven.

En wie kwoajongs d’r achteraan zingend: “Koboa, wilt doe trauwen, trau doe din mit Piet, kinst gain beter kriegen as Reenke Piet!” Doarmit haren wie heur aal laank te veuren vervolgd.

As Haarmien ’t op zin haar om ’n  ongunsteg oordail over joe te vellen, din was je nog nait gelukkeg, want heur tong was scharp as ’n scheermes. Aantje Piet, heur snoarske en Haarmke Primeé, dei mit mond ook hail wat veur ’n dag konnen bringen, wazzen nog moar kinder bie heur!

Aantje Piet, dei, evenas voader en bruirs, wraid op ’t waark was, traude mit Kneels Jongsmoa, ’n Vrais en haar heur keerl beter onder bedwang as heur sproakvermogen! Zai haar ’n zeun mit Kneels Jongsmoa en was de ainegste van de Piet Geezen, dei ’n noakomeling haar.

Meschain leeft dei nog wel.